Mellombels forskrift om førebygging av koronasmitte  - Øystre Slidre kommune

(vedteke av kommunestyret i Øystre Slidre 25. mars 2021, i sak 25/21)

Heimel: Fastsett av Øystre Slidre kommunestyre 25. mars 2021 med heimel i lov av 5. august 1994 nr. 55 om vern mot smittsomme sykdommer § 4-1.

§ 1 Føremål

Forskrifta sitt føremål er å hindre eller avgrense smitte av koronaviruset (SARS-CoV-2) gjennom tiltak som er tilpassa tilhøva.

§ 2 Verkeområde

Forskrifta gjeld alle personar, organisasjonar og verksemder med fast eller mellombels opphald i Øystre Slidre kommune.

Påbod om munnbind gjeld ikkje for barn under 12 år, eller personer som av medisinske eller andre årsaker ikkje er i stand til å bruke munnbind.

§ 3 Definisjonar

Med «arrangement» i denne forskrifta er meint arrangement slik det er definert i den nasjonale Covid -19 forskrifta («Forskrift om smitteverntiltak mv. ved koronautbruddet»), § 13, bokstav a-e.

§ 4a Påbod om å bruke munnbind i butikkar og på kjøpesenter

Det skal nyttast munnbind i butikkar og fellesareal på kjøpesenter. Plikta gjeld både for tilsette og kundar.

§ 4b Påbod om å bruke munnbind på serveringsstader

Tilsette på serveringsstader skal bruke munnbind når dei er i lokale der det oppheld seg gjester.

Gjester som besøker serveringsstader skal bruke munnbind når dei ikkje sit ved bordet.

§ 4c Påbod om å bruke munnbind i kollektivtransport

Passasjerar i kollektivtransporten skal bruke munnbind.

§ 4d Påbod om å bruke munnbind i taxi

Passasjerar skal bruke munnbind i taxi. Munnbindet skal takast på før passasjerane set seg inn i taxien, og skal ikkje takast av før reisa er avslutta og passasjeren har gått ut av taxien.

Plikta til å bruke munnbind gjeld tilsvarande for sjåfør når det er passasjerar i taxien.

§ 4e Påbod om å bruke munnbind ved innandørs arrangement

Besøkande på innandørs arrangement skal bruke munnbind.

§ 5 Avstandsreglar i skiheisanlegg

Eigarar av skiheisanlegg skal syte for at det er lagt til rette for at det skal være minst to meters avstand mellom publikum som ikkje kjem frå same husstand i kø ved heis og ved uteservering el.l. Det skal om nødvendig gjennomførast vakthald for å sikre at kravet blir etterlevd.

I stolheis skal det være minst eitt ledig sete mellom passasjerar som ikkje kjem frå same husstand.

§  6 Ansvar

Øystre Slidre kommune påtek seg ikkje økonomisk ansvar som følgje av pålagde tiltak.

§ 7 Straff

Forsettleg eller grovt aktlaust brot på føresegner i denne forskrifta eller vedtak gitt med heimel i forskrifta er straffbart, jf. lov 5. august 1994 nr. 55 om vern mot smittsame sjukdommar § 8-1.

§ 8 Ikraftsetjing og varigheit

Forskrifta trer i kraft 26. mars 2021 og gjeld til og med 7. april 2021.