I samarbeid mellom kommunen og løypelaga er det utvikla merke- og infosystem som skal gjeva informasjon om ferdigheitskrav samt sikker orientering i alle preparerte løyper.
Eit sentralt element er fargekoding av løypene ut frå kor krevjande dei er med omsyn til høgde, vêrtilhøve og terreng:

• Grøne løyper (G) – skjerma skogsløyper i lett terreng.
• Blå løyper (B) – middels krevjande løyper i fjellskogen og lågfjellet.
• Raude løyper (R) – krevjande løyper på snaufjellet med større krav til ferdigheiter, kondisjon og utstyr.
• Svarte løyper (S) – svært krevjande løyper i høgfjellet.

Det andre sentrale elementet er nummerering av rundar/løyper der oblat med rett farge og nummer blir festa på løypestikk. Saman med lett tilgjenglege løypekart (kartkasser, nedlastning m.m.) gjev dette sikker orientering uavhengig av kartferdigheiter og språk, samtidig som det er stor fleksibilitet i høve til planlegging av eigne turar/rundar.

Heile løypenettet i kommunen er, som det går fram av kartet klassifisert og nummerert etter dette systemet. Ein annan fordel med dette systemet er moglegheit til å skilja mellom løyper på ulike nivå (lokale-, allmenne-, hovudløyper). Det er berre er løyper av ’allmenn’ interesse som er nummerert. Gjennomgåande hovudløype (Danebuløypa) har også oransje oblat med tekst R0 .

Systemet er etablert for Yddin -Javnlie og Melladn løypelag sine område.
I arbeidet med løypeplan har vi erfart at særleg barn kan føle seg utrygge i løypene pga. lause hundar. I kommunal forskrift om hundehald er det difor m.a. innført utvida bandtvang i delar av løypenettet. Sjå kart i menyen i høgre kolonne og oppslag i løypene for meir info om kva for løyper dette gjeld.

Her finn du kart over alle skiløyper i kommunen der utvida bandtvang gjeld (PDF, 47 MB)

Det er 7 løypelag som står for drift av løypenettet i kommunen, og som årleg mottek kommunalt tilskott. Kvart av dei seks laga har kvar sine områder dei har ansvar for å koordinere, og alle har inngått avtale med kommunen om tilhøve rundt preparering av skiløypene. Avtala med løypelaga, saman med grunneigaravtaler er med på å skape heilskap og forutsigbarheit kring løypenettet.
Det er tre løypelag som tek seg av hovudløypenettet i kommunen;

• Melladn Turløyper har ansvar for sørområdet frå kommunegrensa mot Nord – Aurdal til Yddin.
• Yddin – Javnlie Løypelag har ansvar for midtområdet i kommunen frå Yddin til Øysterli.
• Beitostølen Løypeforening har ansvar for løypene frå Øysterli, vestover inn i Vang/Vestre Slidre- og nordover.

I tillegg er det fire mindre løypelag som tek seg av lokale grendeløyper:

• Rogne Idrettslag har ansvar for løype frå Rogne til Juvike, samt ljosløype i Rogne.
• Øystre Slidre Idrettslag har ansvar for løyper i Heggenesområdet og ljosløypa ved Storeføss.
• Volbu Grendelag har ansvar for grendeløypene i Volbu og Nørre Rogne.
• Midtre Hegge og Dale grendelag har ansvar for grendeløypene i Dale og Skammestein.

Informasjon om løypebidrag og fakturering

I Øystre Slidre kommune har det gjennom mange år vore inngått utbyggingsavtalar mellom utbyggjarar og kommunen. Desse avtalane regulerer arbeidsfordelinga for vatn, veg, avløp, skiløyper og andre fellesgode i området. Kommunen samarbeider med Løypeforeininga for å finne gode løysingar for oppfølging av punkt som gjeld skiløyper og løypebidrag i avtalane.

I fleire utbyggingsavtalar er det fastsett at alle fradelte tomter skal betale årleg løypebidrag. Dette har i liten grad vore kravd inn, men vi set stor pris på dei frivillige innbetalingane som har kome. For å sikre god løypekøyring kvar vinter, få meir stabile inntekter og redusere tidsbruk på fakturering, vil kommunen ta over faktureringa for dei fleste tomtene der det er tinglyst plikt til å betale løypebidrag. Det fakturerte beløpet vil gå uavkorta til Beitostølen Løypeforeining.

Når rekninga er betalt, har du òg rett til å registrere deg i Løypeklubben og nyte fordelar på Beitostølen. Meir informasjon finn du på: https://beitolangrenn.no/tinglyst/

Har du fått rekning, men alt betalt frivillig?

Ta kontakt med Mina Haaverstad, e-post: mina.haaverstad@oystre-slidre.kommune.no

Har du spørsmål om tinglyst plikt eller ønskjer å tinglyse plikt til å betale løypebidrag?

Ta kontakt med Mina Haaverstad, e-post: mina.haaverstad@oystre-slidre.kommune.no