Beitostølen helsesportsenter har i ei årrekkje vore ein sentral institusjon i Øystre Slidre og ein viktig del av identiteten til lokalsamfunnet. Dei får prisen for sitt arbeid i tråd med Anna og Erling Stordahl sin filosofi om å sjå moglegheiter framfor avgrensingar – eit arbeid som har ført til at Beitostølen blir omtala som «paraidrettens vugge»i Noreg.

Gjennom mange tiår har senteret vore ein pådrivar for deltaking, meistring og livskvalitet for menneske med funksjonsvariasjonar. Dei har utvikla og formidla kunnskap om korleis fysisk aktivitet, friluftsliv og fellesskap kan bidra til livsglede og deltaking, og har vore ein pioner innan habilitering og rehabilitering i Noreg.

Verksemda har hatt særleg stor betydning for barn og unge, ved å gi opplevingar av meistring og tilhøyrsle som varer livet ut. Gjennom aktivitet, kunnskapsutvikling og synleggjering – ikkje minst forsterka gjennom Team Pølsa den siste tida – har dei sett både Øystre Slidre og dette verdigrunnlaget tydeleg på kartet.

Samstundes er helsesportsenteret ein viktig møteplass for lokalsamfunnet. Gjennom fasilitetar som lyskapellet, gymsalen og symjehallen har senteret skapt arenaer der folk i bygda kan møtast til aktivitet, fellesskap og opplevingar på tvers av generasjonar, og uavhengig av funksjonsevne. 

Beitostølen helsesportsenter er i dag eit leiande senter nasjonalt, og har gjennom sitt arbeid ikkje berre levert helsetenester av høg kvalitet, men også bidrege til å utvikle ein kultur for inkludering, aktivitet og deltaking – verdiar som står heilt sentralt i eit levande lokalsamfunn.
 

Øystre Slidre helselag har gjennom meir enn hundre år vore ein sentral aktør i lokalsamfunnet og ein berebjelke i det frivillige arbeidet i kommunen. Gjennom sitt engasjement arbeider laget for god folkehelse, trivsel og gode opplevingar i kvardagen for menneske i alle aldrar. 

Med eit breitt spekter av aktivitetar – frå tilbod for barn og unge til sosiale møteplassar for eldre – skapar helselaget inkluderande arenaer der deltaking og fellesskap står i sentrum. Dei bidreg med alt frå aktivitetar i skule og barnehage til turar, møteplassar og tiltak som fremjar både fysisk og psykisk helse. 
 

Laget er ein viktig pådrivar for engasjement i viktige saker som folkehelse og demens, og syner gjennom sitt arbeid eit sterkt samfunnsansvar. Samstundes er dei ein synleg og positiv samarbeidspart for både kommune, skulane og andre organisasjonar.

Gamaldansgruppa Kælvemellin har på kort tid markert seg som eit friskt og lovande tilskot til musikklivet i Øystre Slidre. Gruppa, som består av Torstein Furulund, Sigurd Melbye Strand, Nelly Hegge-Hippe, Ole Matias Aarøen Haugen, Solveig Onstad, Magnus Sunnvoll Melbye og Vetle Hegge Blomlie starta opp som ei samspelgruppe i kulturskulen i februar 2026, og har allereie vist eit imponerande nivå av samspel og formidling.

Gjennom fleire konsertar, både i og utanfor kulturskulen, har dei gjort seg bemerka, og dei har bidrege til å skape liv og engasjement rundt gamaldansen. Samarbeidet med etablerte miljø, mellom anna gjennom speleoppdrag på dansekveldar på frivilligsentralen saman med Skarvemellen, viser både vilje til utvikling og respekt for tradisjonane dei står i.

At gruppa i løpet av så kort tid også har kvalifisert seg til landsfestivalen i UKM 2026, understrekar det høge nivået og det store potensialet dei representerer.

Kælvemellin er eit viktig bidrag til å føre vidare og fornye den lokale folkemusikktradisjonen. Gjennom speleglede, engasjement og samspel er dei med på å sikre rekruttering og vidareføring av gamaldansen i regionen
 

Skimakar’n og budeia - Thomas Aslaksby og Kathrin H. Aslaksby - får prisen for sitt engasjement og arbeid med å synleggjere og utvikle landbruksnæringa i Øystre Slidre. Gjennom drift av open støl gjev dei både innbyggjarar og tilreisande eit nært møte med levande stølskultur og tradisjonar. Stølskulturen er no også innskriven på UNESCO si liste over immateriell kulturarv, noko som understrekar verdien av arbeidet dei står i. 

Verksemda utmerkar seg med produksjon av ost i verdsklasse, noko som bidreg til å setje Øystre Slidre på kartet – langt utover regionen og landet. Samstundes tek dei vare på og vidarefører viktige handverkstradisjonar innan både mat og handarbeid, og syner oss verdien av å kunne skape noko med eigne hender.

Gjennom kursverksemd og formidling, også retta mot barn og unge, er dei med på å inspirere nye generasjonar til å ta vare på kunnskap og tradisjonar. Dei har òg bidrege til auka merksemd nasjonalt gjennom medverknad i produksjonar som Jon blir bonde og Team Pølsa, der stølen og arbeidet deira har fått brei synlegheit.

Skimakar’n og budeia representerer eit næringsliv som byggjer på tradisjon, kvalitet og nyskaping, og er eit framifrå døme på korleis lokal kunnskap og engasjement kan skape verdiar for både lokalsamfunn og omverda.