Øystre Slidre kommune som fakturautsteder kan ikkje påverke i kva for kanal du vil få fakturaen i. Du styrer dette fullt og heilt på eiga hand. Før fakturaen sendast blir det gjort eit oppslag mot dei ulike kanalane i ei preferert rekkefølgje, og fakturaen blir sendt til den høgast rangerte kanalen som er aktiv.

Rekkjefølgja er slik:

1. Avtalegiro
2. eFaktura
3. Vipps regning
4. Digital postkasse innbyggjar
5. E-post
6. Blankett/papir

AvtaleGiro er tilpassa deg som ønskjer automatisk betaling av rekningane dine. Med denne løysinga besørger banken at dei faste rekningane blir betalt frå konto på forfallsdato.

Ønskjer du å motta faktura via AvtaleGiro, må du sjølv inngå avtale om dette med din bank.

Dersom du har Avtalegiro, vil betalingsvarselet blir forsøkt distribuert digitalt.
NB! du får berre betalingsvarsel (grunnlaget for fakturaen) dersom du sjølv har bedt om Avtalegiro med skriftleg varsel i banken din.

eFaktura er eit godt alternativ til AvtaleGiro. Vi vil anbefale alle våre kunder å opprette eFakturaavtale i banken. eFaktura sikrar at fakturaen kjem raskt fram til mottakar, samt at den er ferdig utfylt, slik at du ikkje treng å taste kontonummer, KID og beløp. eFaktura må godkjennast i nettbank før den blir betalt.

Vipps Regning betyr at du brukar Vipps, og har aktivert Vipps Regning i appen. Betaling av rekningar i Vipps er veldig enkelt og ein bestemmer sjølv om betalinga skal skje umiddelbart eller ved forfallsdatoen som står på fakturaen.

Vipps Regning er eit produkt der fakturaen fullt og heilt er sendt til Vipps. Samtidig finns det og ein variant der ein eFaktura visast i Vipps. Dette blir styrt av innstillingar i Vippsappen.

Vipps kjem stadig med nye oppdateringar av sin app for å bedre funksjonalitet og brukeropplevinga. Vipps som selskap tek sjølv beslutningar om kva for innstillingar som følgjer med ei oppdatering. Til dømes har det blitt lansert oppdateringar som inneheld automatisk samtykke i å motta fakturaer på Vipps. Mange har reagert på at dei ikkje har gjort dette valet sjølve, men valet er gjort i det du har lasta ned oppdateringa.

Dersom du ikkje ønskjer å motta Vippsregning, eller visning av eFaktura i appen, må du gå inn på innstillingane i appen og deaktivere dette.
Dette gjer du slik:

• Logg deg inn i Vipps-appen
• Klikk på "Profil" nederst til høgre
• Klikk på "Regninger og eFaktura"
• Under regninger ser du "Vis regninger i Vipps". Klikk på venstre så den blir gråhvit. Vipps Regninger er no deaktivert.

Hugs at dersom du deaktiverar Vipps Regning før ein uteståande faktura er betalt, må du betale fakturaen manuelt. Du finn betalingsinformasjonen på fakturaen i Vipps.

For å motta faktura på Digipost eller eBoks må ein sjølv ha oppretta ei digitalpostkasse. 

Fakturaer sendt til Digital postkasse innbyggjar (Digipost/eBoks) er å ansjå som fullverdige postleveransar. Varsling via SMS eller e-post på motteke post blir styrt fullt og heilt på dine eigne innstillingar for varsling inne i di digitale postkasse, og kan ikkje styrast eller overstyrast av Øystre Slidre kommune.

Dersom du ikkje vil motta faktura i digital postkasse, må du aktivere ein høgare rangert kanal (Avtale Giro/eFaktura/Faktura via Vipps) eller deaktivere den digitale postkassa.

Du kan reservere deg mot å motta digital post frå offentleg sektor på www.norge.no/reservasjon

Ønskjer du å få faktura tilsendt som eit pdf-vedlegg i ein e-post, kan du sende oss ein e-post med di e-postadresse til post@oystre-slidre.kommune.no

Vi må presisere at dersom du har valgt andre kanalar som avtalegiro, eFaktura, Vipps Regning eller Digital postkasse, så vil faktura bli sendt dit.

Dersom vi ikkje får treff i nokon digitale kanalar, vil faktura bli levert i postkassa di. 

Den einaste forskjellen du vil merke er at utsjåande på fakturaen er noko endra. Den nye blanketten har ikkje girodel, så om du ønskjer å nytte brevgiro må du fylle ut ein tom giroblankett. Bankgiroblankettar kan du få i din lokale bank. 

Informasjon som må fyllast ut på den tomme fakturablanketten er:

• Beløp
• Betalaren sitt bankkontonummer
• Betalt av
• Betalt til
• Kundeidentifikasjon (KID)
• Kroner og øre
• Til konto