Bakgrunn og føremål med planarbeidet

Raubrøtmoen industriområde er i dag eit etablert næringsområde på om lag 127 dekar. For å møte behovet for meir næringsareal i kommunen, ønskjer Øystre Slidre kommune å leggje til rette for ei utviding av området med om lag 27 dekar. Det samla planområdet, med grøntareal vil etter utvidinga utgjere om lag 170 dekar.

Føremålet med reguleringsplanen er å utvide område for å dekke behovet for næringsareal i kommunen og sikre ei føreseieleg og heilskapleg utvikling av industriområdet, med tilrettelegging for etablering av verksemder innanfor industri, lager og anna næringsverksemd.
 

Planområdet

Planområdet ligg i tilknyting til eksisterande industriområde på Raubrøtmoen, aust for Robølsvegen. Området omfattar både eksisterande og planlagt utviding, og består i dag hovudsakleg av skogs- og utmarksareal.

Plangrense Raubrøtmoen

Viktige omsyn i planarbeidet

I planarbeidet vil det verte lagt særleg vekt på:

• Bevaring av viktige stiar og ferdselsårer i området, slik at tilgangen til friluftsområde og natur vert ivareteken for allmenta.
• Etablering av ei omsynssone langs elva, for å ta vare på naturmangfald, landskapsverdiar og flaumsikring.
• Tilpassing til landskap og terreng, med fokus på å redusere inngrep og sikre god estetisk utforming.
• Trafikale løysingar, inkludert trygg og funksjonell tilkomst til området både for mjuke trafikantar og køyretøy.
• Naturmangfald, der ein vil kartlegge og ta omsyn til eventuelle sårbare artar og naturtypar i området, i tråd med naturmangfaldslova.
• Kulturminne, der vil det verte gjennomført ei vurdering av om det finst automatisk freda eller andre verneverdige kulturminne innafor planområdet. Eventuelle funn vil verte handtert i samråd med kulturminnemyndigheitene.

Medverknad og høve til å kome med innspel

Formålet med varsel om oppstart av reguleringsplan, er å informere om tiltaket og få innspel til planlegginga tidleg i prosessen. Syner til planavgrensing.

Innspel

Innspel kan sendast til kommunen i e-post til: post@oystre-slidre.kommune.no eller i ordinær post til Øystre Slidre kommune, Bygdinvegen 1989, 2940 Heggenes, innan 13.08.2025.

Vidare prosess

Etter varsling om oppstart vil det verte utarbeidd eit planforslag som vert lagt ut til offentleg ettersyn i samsvar med plan- og bygningslova. Det vil då vere ny høve til å kome med merknader før endeleg vedtak. Høyringa vert kunngjort i avisa og berørte vil få planforslaget tilsendt.

Har du spørsmål?

Har du spørsmål, ta kontakt med sakshandsamar Martin Lie Sjursen, e-post: martin.lie.sjursen@oystre-slidre.kommune.no