Arealdelen av kommuneplanen 2026-2038

Kommuneplanen sin arealdel (2026-2038) er endeleg vedteken. Øystre Slidre kommunestyre har i møte torsdag 11. juni 2026 (sak 35/26) vedteke kommuneplanens arealdel. Planen trer i kraft frå kunngjeringsdatoen og vil leggje føringane for framtidig arealbruk og utvikling i heile kommunen fram mot 2038.

Omfattande prosess og stort engasjement

Arbeidet med arealdelen har vore ein omfattande prosess med stort engasjement frå både innbyggjarar, naboar og offentlege instansar.

Kommunen har motteke ei rekkje innspel og merknader i løpet av planarbeidet. Alle innkomne innspel har vorte registrerte, vurderte og lagde fram for politikarane til den endelege saksbehandlinga. Det kom også totalt 19 motsegner frå ulike sektormyndigheiter, og alle desse vart løyst før det endelege vedtaket vart fatta.

Øystre Slidre kommune ønskjer å rette ein stor takk til alle som har bidratt med innspel og delteke i dialogen. Dykkar medverknad har vore viktig for å forme den nye arealplanen.

Kommunestyret sitt vedtak

«Kommunestyret vedtek arealdelen til kommuneplanen 2026-2038 med tilhøyrande plankart, føresegner og retningsliner. Vedtaket er fatta med heimel i plan- og bygningslova §11-15. Planen vert kunngjort, og trer i kraft frå kunngjeringsdato.»

Etter plan- og bygningslova § 11-15 tredje ledd kan kommunestyret sitt vedtak om kommuneplanen sin arealdel ikkje påklagast.